Toshkentdagi 9 qavatli uy yonidagi kotlovan o‘pirilishi bo‘yicha jinoyat ishi qo‘zg‘atildi
Hodisa oqibatida bir nafar fuqaro tan jarohati olib, shifoxonaga yotqizilgan.
Toshkent shahrining Olmazor tumanida ko‘p qavatli uy yaqinida qurilish ishlari davomida kotlovan o‘pirilishi yuzasidan jinoyat ishi qo‘zg‘atildi.
Ma’lum qilinishicha, hodisa 2-avgust kuni Orzu massivi, 3-uy manzilida joylashgan qurilish obyektida sodir bo‘lgan. Dastlabki ma’lumotlarga ko‘ra, mehmonxona qurilishi uchun kotlovan qazish ishlari olib borilayotgan vaqtda pudrat tashkiloti ehtiyotsizligi oqibatida kotlovan cheti o‘pirilgan.
Hodisa oqibatida elektr kabeliga shikast yetgan va yong‘in yuzaga kelgan. Shuningdek, bir nafar fuqaro tan jarohati olib, shifoxonaga yotqizilgan. Hozirda uning davolanishi davom etmoqda.
Bosh prokuratura ma’lumotiga ko‘ra, holat yuzasidan mas’ul MCHJ mansabdor shaxslarining harakatlarida Jinoyat kodeksining 257-moddasi (mehnatni muhofaza qilish qoidalarini buzish) hamda 192-11-moddasi (nodavlat tashkilot mansabdor shaxslari tomonidan vakolatlarni suiiste’mol qilish) alomatlari mavjudligi sababli jinoyat ishi qo‘zg‘atilgan.
Ayni paytda hodisa yuzasidan tergov harakatlari olib borilmoqda. Mutasaddilarning xatti-harakatlariga huquqiy baho berilib, qurilish me’yorlari va shaharsozlik talablari buzilishiga yo‘l qo‘ygan shaxslarga nisbatan qonunchilikda belgilangan tartibda choralar ko‘rilishi ma’lum qilindi.
