Xalqaro qidiruvdagi o‘zbekistonlik Dubaydan mamlakatga qaytarildi
Firibgarlikda ayblangan gumonlanuvchi tergovdan qochib, uzoq vaqt xorijda yashirinib yurgan.
Interpol va xalqaro huquqni muhofaza qiluvchi idoralar hamkorligida xalqaro qidiruvda bo‘lgan O‘zbekiston fuqarosi Dubaydan mamlakatga qaytarildi.
O‘zbekiston Ichki ishlar vazirligi, Interpol Milliy markaziy byurosi hamda xalqaro hamkorlarning muvofiqlashtirilgan sa’y-harakatlari natijasida xalqaro qidiruvda bo‘lgan fuqaro N.U. Birlashgan Arab Amirliklarining Dubay shahridan O‘zbekistonga ekstraditsiya qilindi.
Qayd etilishicha, mazkur shaxs firibgarlik jinoyatini sodir etganlikda ayblanib, tergovdan yashirinish maqsadida O‘zbekistonni tark etgan va uzoq vaqt davomida xorijda bo‘lib kelgan.
Tezkor axborot almashinuvi, xalqaro hamkorlar bilan olib borilgan qo‘shma tadbirlar hamda Interpol kanallari orqali amalga oshirilgan qidiruv ishlari natijasida uning yashash joyi aniqlanib, zarur protsessual choralar ko‘rilgan. Shundan so‘ng fuqaro O‘zbekiston Respublikasi Ichki ishlar vazirligi vakili ishtirokida Dubaydagi Bosh konsulxonada belgilangan tartibda qabul qilinib, mamlakatga qaytarilgan.
