Chilonzorda noqonuniy qurilmalar demontaj qilinib, piyodalar yo‘laklari bo‘shatilmoqda
Toshkent hokimi tumandagi obodonlashtirish, elektr ta’minoti va infratuzilma obyektlaridagi ishlar bilan tanishdi.
Toshkent shahrida jamoat joylarini tartibga keltirish, noqonuniy qurilmalarni bartaraf etish hamda qulay va xavfsiz shahar muhitini yaratish bo‘yicha ishlar davom etmoqda.
Toshkent shahar hokimi Shavkat Umurzakov Prezident Administratsiyasining Jamoat xavfsizligi va qonun ustuvorligini ta’minlash masalalari bo‘yicha departamenti boshlig‘i birinchi o‘rinbosari Aziz Azimov, shuningdek, tegishli idoralar va Chilonzor tumani mas’ullari hamrohligida tumandagi bir qator obyektlarda amalga oshirilayotgan ishlar bilan tanishdi.
O‘rganishlar davomida asosiy e’tibor jamoat joylarini noqonuniy qurilmalardan tozalash, obodonlashtirish, muhandislik-kommunikatsiya infratuzilmasini rivojlantirish hamda xavfsiz shahar muhitini yaratishga qaratildi.
Xususan, “Qatortol” ko‘chasi va bozori hududida piyodalar yo‘laklarini egallab turgan noqonuniy obyektlarni demontaj qilish ishlari ko‘zdan kechirildi. Ta’kidlanishicha, ushbu qurilmalar sabab piyodalar qatnov qismidan harakatlanishga majbur bo‘lib kelgan.
Bugun shahar piyodalarga o‘zlarining qonuniy hududini qaytarmoqda. Trotuarlar, avvalo, insonlar — bolalar, keksalar, aravachali ota-onalar, nogironligi bo‘lgan shaxslar va shahar bo‘ylab har kuni piyoda harakatlanadigan barcha aholi uchun mo‘ljallangan.
Shuningdek, “Zarqo‘rg‘on” mahallasidagi obodonlashtirish ishlari, “Navbahor” mahallasida elektr ta’minoti ishonchliligini oshirish masalalari hamda “Lutfiy” mahallasidagi GES-9 podstansiyasi faoliyatidagi mavjud muammolar ham o‘rganildi.
Mas’ullar qayd etishicha, amalga oshirilayotgan chora-tadbirlarning bosh maqsadi shahar infratuzilmasini yanada rivojlantirish, jamoat joylarida tartibni ta’minlash hamda poytaxtni barcha aholi uchun qulay, xavfsiz va shinam maskanga aylantirishdan iborat.
