Davlat xizmatchilari mehnatiga haq to‘lash tizimini takomillashtiriladi

 

Prezident Shavkat Mirziyoyev davlat fuqarolik xizmatchilarining mehnatiga haq to‘lash tizimini takomillashtirish va oylik ish haqi shartlarini yagona tartib asosida shakllantirish bo‘yicha ishlab chiqilgan takliflar taqdimoti bilan tanishdi.

 

So‘nggi yillarda davlat fuqarolik xizmatini isloh qilish doirasida kadrlarni tanlash, ishga qabul qilish va rag‘batlantirish tizimini takomillashtirish bo‘yicha keng ko‘lamli ishlar amalga oshirildi. Davlat fuqarolik xizmatchilarining huquq va majburiyatlarini belgilovchi alohida qonun qabul qilinib, davlat organlaridagi boshqaruv xodimlari shtat birliklari 73 mingdan 54 mingtagacha optimallashtirildi.

 

Taqdimot davomida amaldagi ish haqi tizimidagi mavjud nomutanosibliklar tahlil qilindi. Qayd etilishicha, bugungi kunda davlat xizmatchilari ish haqi tarkibida lavozim maoshining ulushi 15 foizdan oshmaydi, ish haqi fondining asosiy qismini esa xodim faoliyati natijalariga bog‘lanmagan ustama va rag‘batlantirish to‘lovlari tashkil etmoqda. Bu esa bir xil lavozimdagi xodimlar o‘rtasida maosh tafovutlarini yuzaga keltirmoqda.

 

Shu munosabat bilan davlat fuqarolik xizmatchilari uchun yagona, shaffof va natijaga asoslangan mehnatga haq to‘lash tizimini joriy etish taklif qilindi.

 

Yangi tizim 54 ming nafar davlat xizmatchisini qamrab olishi rejalashtirilgan. Unda davlat organlari boshqaruv darajalariga, xodimlar esa bajaradigan vazifalariga qarab guruhlarga ajratiladi. Xalqaro tajriba asosida 11 razryad va 6 pog‘onadan iborat yangi ish haqi setkasini joriy etish, ko‘plab ustama va mukofotlar o‘rniga uchta asosiy rag‘batlantirish to‘lovini qo‘llash nazarda tutilmoqda.

 

Xususan, xodimlarning malakasi, funksional vazifalarni bajarish sifati, mehnat va ijro intizomi hamda KPI ko‘rsatkichlari asosida ustamalar belgilanadi. Bundan tashqari, murakkab vazifalarni muvaffaqiyatli bajargan, innovatsion yondashuvlarni joriy etgan va yuqori natijalarga erishgan xodimlarga hisobot davri yakunlariga ko‘ra bonus to‘lovlari berilishi rejalashtirilmoqda.

 

Takliflarga ko‘ra, hududiy boshqarmalar xodimlarining ish haqi tegishli hokimliklardagi o‘xshash lavozimlar maoshidan yuqori bo‘lmaydi. Tuman va shaharlarda esa ish haqi hamda shtat birliklarini belgilashda aholi soni va hududning o‘ziga xos xususiyatlari inobatga olinadi.

 

Prezident mehnatga haq to‘lash tizimida adolat va shaffoflikni ta’minlash, ish haqini xodimning malakasi, mas’uliyati hamda erishgan natijalari bilan bevosita bog‘lash muhimligini ta’kidladi. Shuningdek, bonus to‘lovlari sun’iy intellekt va zamonaviy axborot texnologiyalarini o‘zlashtirish, kasbiy malakani oshirish kabi aniq mezonlar asosida belgilanishi lozimligi qayd etildi.