“Isroil bilan muzokaralar faqat xo‘rlikka olib keladi” – Hizbulloh
Isroil qo‘shinlari Livan hududini tark etmaguncha va hujumlar to‘xtamaguncha muzokaralar bo‘lmasligi bildirildi.
“Hizbulloh” bosh kotibi Shayx Naim Qosim Isroil bilan muzokaralar Livanga hech qanday foyda keltirmasligini bildirib, bunday muloqot faqat bosim va xo‘rlikka olib kelishini ma'lum qildi. Uning aytishicha, Isroil Livan hududidagi harbiy amaliyotlarini davom ettirar ekan, muzokaralar uchun zarur shart-sharoit mavjud emas. Bu haqda Tasnim xabar berdi.
"Sionistik rejim bilan muzokaralar xo‘rlikdan boshqa narsa keltirmaydi", degan Shayx Naim Qosim.
Uning ta'kidlashicha, avvalo Isroil Livan hududidan o‘z qo‘shinlarini olib chiqishi, hujumlarni to‘xtatishi hamda mamlakat suverenitetini hurmat qilishi lozim. Shundan keyingina mavjud muammolarni hal etishning boshqa yo‘llari muhokama qilinishi mumkin.
Naim Qosim Livan hukumati va xalqini tashqi bosimlarga yon bermaslikka chaqirgan. Uning so‘zlariga ko‘ra, Isroilning harbiy bosimi ostida qabul qilinadigan har qanday qaror Livan manfaatlariga zid bo‘ladi va mamlakatning mustaqilligiga putur yetkazadi.
“Hizbulloh” yetakchisi qarshilik harakati Livan xavfsizligini ta'minlashda muhim rol o‘ynayotganini ta'kidlab, tashkilot mamlakat hududi va xalqini himoya qilishni davom ettirishini bildirgan. U Livan ichidagi birlikni saqlash va tashqi tahdidlarga qarshi umumiy pozitsiyani mustahkamlash zarurligini ham qayd etgan.
