Janubiy Koreyada jazirama oqibatida 16 kishi halok boʻldi

 
Janubiy Koreyada davom etayotgan rekord darajadagi jazirama oqibatida halok bo‘lganlar soni 16 nafarga yetdi. Mamlakat prezidenti Li Je Myon hukumat va mahalliy hokimiyat organlariga ekstremal issiqdan zarar ko‘rayotgan aholini qo‘llab-quvvatlash choralarini kuchaytirish, shuningdek, favqulodda vaziyatlarga javob berish tizimini takomillashtirish bo‘yicha topshiriqlar berdi. Bu haqda Reuters xabar berdi.

 
Prezidentning ta'kidlashicha, ekstremal ob-havo hodisalari tobora tez-tez kuzatilmoqda va mavjud inqirozga qarshi kurash tizimi yangi iqlim sharoitlariga moslashtirilishi zarur. U, ayniqsa, keksalar, ochiq havoda ishlovchilar va boshqa xavf guruhlariga mansub fuqarolarni himoya qilish bo‘yicha qo‘shimcha choralar ko‘rishni talab qilgan.

 
Janubiy Koreya Meteorologiya boshqarmasi ma'lumotlariga ko‘ra, mamlakat janubi-sharqidagi Yansan shahrida havo harorati 42,5 darajani tashkil etib, 122 yillik meteorologik kuzatuvlar tarixidagi eng yuqori ko‘rsatkich qayd etilgan. Shuningdek, tarixda ilk bor Seul va Kyonggi provinsiyasining ayrim hududlarida eng yuqori darajadagi jazirama ogohlantiruvi e'lon qilinib, keyinchalik u butun poytaxt hududiga kengaytirilgan.

 
Kuchli issiq elektr energiyasi iste'molining keskin oshishiga ham sabab bo‘lgan. Hukumat elektr tarmoqlari uzluksiz ishlashini ta'minlash, sovutish markazlari faoliyatini kengaytirish va aholiga ichimlik suvi hamda boshqa zarur vositalarni yetkazib berish bo‘yicha favqulodda choralarni ishga tushirgan.