O‘zbekistonda ayrim qoidabuzarliklar uchun avtomobil 1 yilgacha olib qo‘yilishi mumkin
Deputatlar avtomobilni vaqtincha olib qo‘yishni nazarda tutuvchi qonun loyihasini birinchi o‘qishda qabul qildi.
Oliy Majlis Qonunchilik palatasi deputatlari ma’muriy jazoning yangi turi — avtomototransport vositasini 6 oydan 1 yilgacha muddatga vaqtincha olib qo‘yishni nazarda tutuvchi qonun loyihasini birinchi o‘qishda qabul qildi.
Qonun loyihasi yo‘l-transport hodisalarining oldini olish, yo‘l harakati ishtirokchilarining hayoti va sog‘lig‘ini himoya qilish hamda qo‘pol qoidabuzarliklar uchun javobgarlikni kuchaytirish maqsadida ishlab chiqilgan.
Hujjat bilan Jinoyat kodeksi, Jinoyat-protsessual kodeksi, Ma’muriy javobgarlik to‘g‘risidagi kodeks hamda “Yo‘l harakati to‘g‘risida”gi qonunga tegishli o‘zgartirish va qo‘shimchalar kiritilishi nazarda tutilmoqda.
Loyihaga ko‘ra, voyaga yetmagan shaxsga transport vositasini boshqarishni topshirish oqibatida og‘ir tan jarohati yoki o‘lim yuz bersa, transport vositasini topshirgan shaxs uchun jinoiy javobgarlik belgilanadi.
Shuningdek, voyaga yetmaganlarga transport boshqaruvini topshirish, noqonuniy poygalar tashkil etish va ularda ishtirok etish, tezlikni 80 km/soatdan ortiq oshirish, yuk transportini tungi vaqtda xavfli holatda qoldirish kabi qoidabuzarliklar uchun javobgarlikni kuchaytirish taklif qilinmoqda.
Bundan tashqari, yo‘l bezoriligi, noqonuniy poyga tashkil etish, transport vositasini mast holda boshqarish yoki tibbiy tekshiruvdan bosh tortish holatlari transport vositasini boshqarish huquqiga ega bo‘lmagan yoki ushbu huquqdan mahrum etilgan shaxslar tomonidan sodir etilganda, avtomobilni 6 oydan 1 yilgacha vaqtincha olib qo‘yish jazosi qo‘llanishi mumkin.
Mazkur jazo chorasi qonunda belgilangan hollarda tuman yoki shahar sudlari tomonidan tayinlanadi.
