O‘zbekistonda imtiyozli transport chiptasi uchun qog‘oz talonlar bekor qilinadi
O'n bir toifadagi fuqarolarga chipta xarid qilish uchun ID-karta yoki biometrik pasportni taqdim etish kifoya qiladi.
Prezident Shavkat Mirziyoyevga imtiyozli transport xizmatlaridan foydalanish tartibini soddalashtirish va ularni raqamlashtirishga qaratilgan takliflar taqdim etildi.
Takliflarga ko‘ra, 11 toifadagi fuqarolar havo, temir yo‘l va shaharlararo transportda bepul yoki 50 foizlik chegirma asosida qatnaydi. Bunda qog‘oz talonlar bekor qilinib, chipta xarid qilish uchun ID-karta yoki biometrik pasportni taqdim etishning o‘zi kifoya qiladi. Imtiyoz huquqi “Yagona milliy ijtimoiy himoya” axborot tizimi orqali tekshiriladi.
Shuningdek, 2027-yil 1-yanvardan imtiyozli avia, temir yo‘l va shaharlararo avtobus chiptalarini “Baraka” ijtimoiy karta mobil ilovasi orqali onlayn xarid qilish imkoniyati yaratiladi.
Ma’lumotlarga ko‘ra, hozirda 1941–1945-yillardagi urush nogironlari va qatnashchilari, ularga tenglashtirilgan shaxslar hamda Chernobil AESdagi avariya oqibatlarini bartaraf etishda ishtirok etgan 48,4 mingdan ortiq fuqaro transport imtiyozlaridan foydalanish huquqiga ega. 2025-yilda ular ushbu xizmatlardan 1,7 million marta foydalangan.
Prezident taqdim etilgan takliflarni ma’qullab, yangi xizmatlarni hududlarda sifatli yo‘lga qo‘yish va ularning ijrosini qat’iy nazorat qilish bo‘yicha topshiriqlar berdi.
