Prezident Administratsiyasining huquqiy maqomi belgilanmoqda
Konstitutsiyaviy qonun loyihasi Prezident Administratsiyasi mansabdor va xizmatchi xodimlari faoliyatining huquqiy kafolatlarini ham mustahkamlaydi.
Oliy Majlis Qonunchilik palatasining navbatdagi majlisida “O‘zbekiston Respublikasi Prezidenti Administratsiyasi to‘g‘risida”gi Konstitutsiyaviy qonun loyihasi birinchi o‘qishda qabul qilindi.
Qonun loyihasi Prezident Administratsiyasining davlat boshqaruvi tizimidagi o‘rni, huquqiy maqomi hamda faoliyatining asosiy yo‘nalishlarini konstitutsiyaviy qonun darajasida belgilashga qaratilgan.
Loyihaga muvofiq, Prezident Administratsiyasi O‘zbekiston Respublikasi Prezidenti tomonidan shakllantiriladi. Shuningdek, Administratsiyaga Prezident tomonidan lavozimga tayinlanadigan va lavozimidan ozod etiladigan Administratsiya rahbari boshchilik qilishi nazarda tutilmoqda.
Hujjatda Prezident Administratsiyasining huquqiy maqomi, faoliyatining asosiy prinsiplari, tarkibiy tuzilmasi va ish faoliyatini tashkil etish tartibi, davlat hokimiyati organlari hamda boshqa tashkilotlar bilan o‘zaro hamkorlik mexanizmlari aniq belgilab berilmoqda.
Shuningdek, qonun loyihasida Prezident Administratsiyasi mansabdor shaxslari, boshqaruv va xizmat ko‘rsatuvchi xodimlari faoliyatining huquqiy kafolatlarini mustahkamlash ham ko‘zda tutilgan.
