Qirg‘izistonda odam jasadini kuydirish taqiqlandi
Krematoriylardan faqat tibbiy biologik chiqindilarni yo‘q qilish maqsadida foydalanishga ruxsat etildi.
Qirg‘iziston prezidenti Sadir Japarov “Dafn etish va dafn ishlari to‘g‘risida”gi qonunga kiritilgan o‘zgartishlarni imzoladi. Mazkur hujjatga muvofiq, mamlakat hududida vafot etgan shaxslarning jasadini kuydirish (krematsiya) rasman taqiqlandi. Bu haqda 24.kg nashri xabar berdi.
Yangi tartibga ko‘ra, krematoriylardan faqat tibbiy faoliyat natijasida hosil bo‘ladigan biologik materiallar — inson a’zolari va to‘qimalarini sanitariya maqsadida termik yo‘q qilish uchun foydalanishga ruxsat etiladi.
Qonunga kiritilgan o‘zgartishlar bilan krematsiya, xokdonlar, kolumbariylar va motam devorlariga oid normalar bekor qilingan. Endilikda fuqarolar, shuningdek shaxsi aniqlanmagan marhumlar faqat qabristonlarda yerga dafn etilishi belgilangan.
Shuningdek, krematoriylardan abort qilingan hamda o‘lik tug‘ilgan homilalarni kuydirish uchun foydalanish ham taqiqlangan.
Yangi qonun rasmiy e’lon qilinganidan so‘ng 10 kun o‘tib kuchga kiradi.
