Surxondaryoda qariyb 100 yillik 11 tup archa noqonuniy qo‘porildi
Daraxtlarni qo‘porish ishlari ekologiya xodimlarining ogohlantirishlariga qaramay amalga oshirilgani bildirildi.
Ekologiya milliy qo‘mitasi Surxondaryo viloyatining Sariosiyo tumani Sangardak mahallasidagi Uzun o‘rmon xo‘jaligiga qarashli hududda daraxtlarni qo‘porish va ularga shikast yetkazish holati yuzasidan rasmiy munosabat bildirdi.
Ma’lum qilinishicha, hodisa yuzasidan Ekologiya milliy qo‘mitasi Ekopolitsiyasi, Bosh prokuratura, Surxondaryo viloyati hokimligi hamda ekologiya hududiy boshqarmasi vakillaridan iborat ishchi guruh tomonidan o‘rganish ishlari olib borilmoqda.
Dastlabki ma’lumotlarga ko‘ra, mazkur ishlar hech qanday ruxsatnomasiz, ekologiya xodimlarining ogohlantirishlariga qaramay amalga oshirilgan.
O‘rganishlar davomida daraxtlarga yetkazilgan ekologik zarar miqdori, qurilish ishlarining amaldagi ekologik qonunchilik talablariga muvofiqligi hamda aybdor shaxslarning javobgarligi yuzasidan huquqiy baho beriladi.
Dastlabki hisob-kitoblarga ko‘ra, hududda qariyb 100 yillik 11 tup Zarafshon archasi qo‘porilgani aniqlangan.
Tekshiruv yakunlari bo‘yicha huquqbuzarlarga nisbatan amaldagi qonunchilik asosida qat’iy choralar ko‘rilishi, natijalar yuzasidan jamoatchilikka qo‘shimcha ma’lumot berilishi ma’lum qilindi.
