Toshkentda fuqarolar uyidan majburiy chiqarilgani aytilmoqda
Toshkent prokuraturasi ijtimoiy tarmoqlarda tarqalgan murojaat yuzasidan rasmiy munosabat bildirdi.
Toshkent shahar prokuraturasi ijtimoiy tarmoqlarda fuqarolar tomonidan uyidan majburiy chiqarib yuborilgani haqidagi murojaat yuzasidan rasmiy munosabat bildirdi.
Ma’lum qilinishicha, fuqarolar R. Payanov va boshqalar o‘zlariga tegishli bo‘lgan uy-joydan majburiy ravishda chiqarib yuborilgani haqida ijtimoiy tarmoqlar orqali murojaat qilgan.
Mazkur holat Toshkent shahar prokuraturasi hamda Toshkent shahar hokimligi vakillari tomonidan voqea joyiga chiqib o‘rganilgan. O‘rganish jarayonida murojaat mualliflari va “MEGA LOGISTICS SERVICE” MCHJ vakillari ishtirok etgan hamda barcha tegishli shaxslardan arizalar qabul qilingan.
Qayd etilishicha, mazkur murojaat Toshkent shahar prokuraturasi nazoratiga olingan bo‘lib, o‘rganish yakunlariga ko‘ra qonuniy qaror qabul qilinishi ta’minlanadi.
