Toshkentda ikki yo‘lovchi avtobusi to‘qnashdi, bir yo‘lovchi jarohatlandi
Jabrlanuvchi avtobus haydovchisi tomonidan tez tibbiy yordam mashinasida Toshkent davlat tibbiyot universiteti stomatologiya klinikasiga yetkazilgan.
“Toshshahartransxizmat” AJ 2 va 18-avtobus saroylariga qarashli avtobuslar ishtirokida sodir bo‘lgan yo‘l-transport hodisasi yuzasidan rasmiy munosabat bildirdi.
Ma’lum qilinishicha, hodisa 2026-yil 2-avgust kuni soat 08:10 atrofida Yunusobod tumani Amir Temur shoh ko‘chasida yuz bergan.
Dastlabki ma’lumotlarga ko‘ra, 17-sonli yo‘nalishda harakatlanayotgan “Yutong” gaz rusumli avtobus haydovchisi ehtiyotsizlik oqibatida “Yulduz” bekatida to‘xtab turgan 85-sonli yo‘nalishdagi “Yutong” elektrobusining orqa qismiga urilgan.
Yo‘l-transport hodisasi oqibatida gaz avtobusidagi bir nafar yo‘lovchi tan jarohati olgan.
Jabrlanuvchi avtobus haydovchisi tomonidan tez tibbiy yordam mashinasida Toshkent davlat tibbiyot universiteti stomatologiya klinikasiga yetkazilgan. Unga zarur tibbiy yordam ko‘rsatilgach, uyiga javob berilgan.
Hodisa oqibatida shikastlangan har ikki avtobusni qayta yo‘nalishga chiqarish uchun ta’mirlash ishlari olib borilmoqda.
Mazkur yo‘l-transport hodisasi Toshkent shahar IIBB YHXB xodimlari tomonidan belgilangan tartibda rasmiylashtirilgan.
