Toshkentda “keshbek” tizimi orqali 4,7 mlrd so‘mlik budjet mablag‘i talon-toroj qilindi

 

Bosh prokuratura huzuridagi Departamentning Toshkent shahar boshqarmasi Soliq qo‘mitasi bilan hamkorlikda o‘tkazgan tergovga qadar tekshiruvda “G.M.” MCHJ mansabdor shaxslari tomonidan “Soliq Mobile” ilovasidagi “keshbek” tizimidan noqonuniy foydalanish holati fosh etildi.

 

Aniqlanishicha, mas’ullar kompyuter texnikasi yordamida go‘yoki 76,2 milliard so‘mlik mahsulot realizatsiya qilingani haqida soxta ma’lumotlar rasmiylashtirgan. Shuningdek, nazorat-kassa mashinalari orqali qalbaki xarid cheklari shakllantirilib, ular Telegram orqali 2 475 nafar Ijtimoiy himoya reyestriga kiritilgan fuqaroga 70–150 ming so‘mdan sotilgan.

 

Natijada “Soliq Mobile” ilovasi orqali 7,5 milliard so‘m keshbek hisoblangan, shundan 4,1 milliard so‘mi budjet mablag‘lari hisobidan noqonuniy to‘lab berilgani aniqlangan.

 

Shu bilan birga, Departamentning Chilonzor tuman bo‘limi va Soliq qo‘mitasi hamkorligida o‘tkazilgan tekshiruvda “E.G.” hamda “I.F.” MCHJ mas’ullari o‘zaro til biriktirib, 10 milliard so‘mlik mahsulot realizatsiyasi yuzasidan soxta ma’lumotlar rasmiylashtirgani ma’lum bo‘ldi.

 

Ular qalbaki xarid cheklarining 1 812 nafar fuqaro nomiga rasmiylashtirilishini ta’minlab, “Soliq Mobile” ilovasi orqali 1 milliard so‘m keshbek hisoblatgan, shundan 640,8 million so‘mi noqonuniy ravishda budjet mablag‘lari hisobidan to‘lab berilgan.

 

Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 228-moddasi (hujjatlarni qalbakilashtirish va ulardan foydalanish) bilan jinoyat ishlari qo‘zg‘atilib, tergov harakatlari olib borilmoqda.