Toshkentda noqonuniy uy buzilishi va qurilishi yuzasidan jinoyat ishi qo‘zg‘atildi
Tegishli ruxsatnomasiz 20, 19, 12 va 2 qavatli turar joy binolari o‘zboshimchalik bilan qurilgani aniqlandi.
Toshkent shahar prokuraturasi “New Port” turar joy majmuasi bilan bog‘liq holat yuzasidan rasmiy munosabat bildirdi.
Ma’lum qilinishicha, joriy yilning 2-avgust kuni ijtimoiy tarmoqlarda “New Port” turar joy majmuasi mansabdor shaxslari tomonidan Yakkasaroy tumani, Damariq MFY, Abdulla Qahhor ko‘chasi, 19-uyda yashovchi fuqarolarga kompensatsiya pullari to‘liq to‘lanmayotgani hamda uy noqonuniy buzilayotgani haqida videomurojaat tarqalgan.
Tergovga qadar o‘tkazilgan tekshiruv davomida “Mega Logistics Service” MCHJ mansabdor shaxslari ushbu manzildagi fuqarolarni majburiy ko‘chirish bo‘yicha ijro harakatlari yakunlanmagan bo‘lishiga qaramay, uyni o‘zboshimchalik bilan buzib tashlagani aniqlangan.
Shuningdek, kompaniya tegishli ruxsatnoma olmasdan hududda bir dona 20 qavatli, ikki dona 19 qavatli, bir dona 12 qavatli hamda bir dona 2 qavatli turar joy binolarini o‘zboshimchalik bilan qurilgani ma’lum bo‘lgan.
Tekshiruv yakunlariga ko‘ra, “Mega Logistics Service” MCHJ mansabdor shaxslari va boshqalarga nisbatan jinoyat ishi qo‘zg‘atildi. Hozirda Toshkent shahar prokuraturasi tomonidan dastlabki tergov harakatlari olib borilmoqda.
Qayd etilishicha, mazkur jinoyat ishi tergovi alohida nazoratga olingan bo‘lib, yakunlari bo‘yicha qonuniy qaror qabul qilinishi ta’minlanadi.
