Eron bilan muzokaralar yaxshi o‘tdi — Tramp
AQSH prezidenti muzokaralar natijalari 48 soat ichida ma’lum bo‘lishi mumkinligini aytdi.
AQSH prezidenti Donald Tramp AQSH va Eron vakillari o‘rtasida o‘tkazilgan muzokaralarni ijobiy baholab, tomonlar o‘rtasidagi muloqot davomida sezilarli yutuqlarga erishilganini ma’lum qildi.
Uning so‘zlariga ko‘ra, muzokaralar samarali o‘tgan va ularning natijalari yaqin 48 soat ichida ma’lum bo‘lishi mumkin. Tramp Eron bilan kelishuvga erishish oqilona qaror bo‘lishini ta’kidlab, voqealar rivojini kuzatish zarurligini qayd etgan.
AQSH prezidenti, shuningdek, muzokaralarda Hormuz bo‘g‘ozi orqali xalqaro yuk tashuvlarini tiklash hamda Eronning yadroviy dasturiga oid masalalar muhokama qilinayotganini bildirgan. Uning aytishicha, birinchi bosqichda bo‘g‘oz faoliyatini tiklash, keyingi bosqichda esa Eronning yadroviy dasturiga oid masalalarni muhokama qilish rejalashtirilgan.
Ayni paytda Eron Tashqi ishlar vazirligi AQSH bilan rasmiy muzokaralar olib borilayotganini rad etib, faqat Ummon vositachiligida Hormuz bo‘g‘ozida kemalar harakati xavfsizligi yuzasidan maslahatlashuvlar davom etayotganini ma’lum qilgan.
