Hamas qurolsizlantirilmaguncha Isroil G‘azoni tark etmaydi — Netanyaxu
Isroil Bosh vaziri G‘azodagi Isroil harbiylari mamlakat xavfsizligini ta’minlash uchun barcha zarur choralarni ko‘rish bo‘yicha topshiriq olganini aytdi.
Isroil Bosh vaziri Benyamin Netanyaxu Hamas harakati to‘liq qurolsizlantirilmaguncha Isroil G‘azo sektoridagi harbiy pozitsiyalarini tark etmasligini ma’lum qildi.
Uning so‘zlariga ko‘ra, Isroil xavfsizlik manfaatlarini himoya qilish masalasida qat’iy pozitsiyada qoladi. Shu bois, Hamas qurolsizlantirilmaguncha Isroil qo‘shinlari G‘azo sektoridagi amaldagi harbiy chiziqlardan chekinmaydi.
Netanyaxu AQSH tomonidan G‘azoni qurolsizlantirish bo‘yicha takliflar taqdim etilganini, biroq Isroil ayrim bandlar yuzasidan o‘z e’tiroz va takliflarini bildirganini qayd etgan.
Bosh vazirning ta’kidlashicha, G‘azo sektorida xizmat qilayotgan Isroil harbiylari mamlakat hududi va fuqarolarini himoya qilish uchun barcha zarur choralarni ko‘rish bo‘yicha topshiriq olgan.
Avvalroq Isroil rasmiylari Hamasning to‘liq qurolsizlantirilishi hamda G‘azo sektorining demilitarizatsiya qilinishi har qanday siyosiy jarayon va kelishuvning asosiy sharti ekanini ma’lum qilgandi.
