“Mening maoshim 4 million yevro emas” — Fabio Kannavaro
O‘zbekiston MTJ bosh murabbiyi o‘zi haqidagi noto‘g‘ri ma’lumotlar tarqatilayotganini va ular haqiqatga mos emasligini ta’kidladi.
O‘zbekiston milliy terma jamoasi bosh murabbiyi Fabio Kannavaro o‘zining yillik maoshi 4 million yevro ekani haqidagi xabarlarni rad etdi.
Matbuot anjumanida so‘zga chiqqan mutaxassisning ta’kidlashicha, O‘zbekiston futbol assotsiatsiyasi bilan tuzilgan kelishuvga ko‘ra, u o‘zi jalb qilgan mutaxassislarning ish haqini shaxsiy mablag‘lari hisobidan to‘lamoqda.
Kannavaroning ma’lum qilishicha, hujumchilar bilan ishlovchi murabbiy Rolando Byanki terma jamoada bepul faoliyat yuritmoqda. Shuningdek, fizioterapevt Simone Sidjilyo Italiyaning Palermo klubidagi faoliyatini tark etib, avvalgi maoshining atigi 20 foiziga ishlashga rozi bo‘lgan.
Murabbiy, shuningdek, so‘nggi vaqtlarda o‘zi haqidagi bir qator haqiqatga to‘g‘ri kelmaydigan ma’lumotlar tarqatilayotganini bildirib, terma jamoa ichida ma’lumotlarni tashqariga sizdirayotgan shaxs borligini ham qayd etdi.
