Nogironligi bo‘lgan abituriyentlarga kirish imtihonlarida qo‘shimcha vaqt beriladi
Shuningdek, ular imtihonlarda Brayl alifbosi, audio va elektron formatdagi materiallardan foydalanish imkoniyatiga ega bo‘ladi.
2027/2028-o‘quv yilidan boshlab nogironligi bo‘lgan abituriyentlar uchun oliy ta’lim muassasalariga kirish imtihonlari, pedagog kadrlarni attestatsiyadan o‘tkazish hamda milliy sertifikat olish imtihonlarida qo‘shimcha qulayliklar yaratiladi. Bu haqda Adliya vazirligi xabar berdi.
Unga ko‘ra, mazkur toifadagi talabgorlarga belgilangan imtihon vaqti me’yorining 50 foizi miqdorida qo‘shimcha vaqt ajratiladi. Shuningdek, imtihon materiallaridan Brayl alifbosi, audio va elektron formatlarda foydalanish imkoniyati yaratiladi.
Qarorga asosan, 2026/2027-o‘quv yilidan alohida ta’lim ehtiyojiga ega bolalar uchun ixtisoslashtirilgan davlat ta’lim muassasalarida o‘qitish individual ta’lim rejalari asosida tashkil etiladi.
Bundan tashqari, 2026-yil 1-sentabrdan korreksion sinf tashkil etgan holda umumiy o‘rta ta’lim xizmatlarini ko‘rsatuvchi nodavlat ta’lim tashkilotlariga ushbu sinflarda ta’lim olayotgan har bir o‘quvchi uchun subsidiya ajratiladi. Unga ko‘ra, Toshkent shahrida BHMning 11 baravari, viloyatlar markazlari va Nukus shahrida BHMning 9,5 baravari, boshqa tuman va shaharlarda esa BHMning 8,5 baravari miqdorida subsidiya to‘lanadi. 2027-yil 1-maydan esa alohida ta’lim ehtiyojiga ega bolalarni vaucher asosida zamonaviy assistiv (yordamchi) vositalar bilan ta’minlash tizimi joriy etiladi.
