O‘zbekiston va Qirg‘iziston hududlarni almashishning amaliy bosqichini boshladi
Aholini ro‘yxatga olish ishlari yakunlangach, ularga Qirg‘iziston fuqaroligini berish bo‘yicha belgilangan tartiblar boshlanadi.
O‘zbekiston va Qirg‘iziston davlat chegarasini demarkatsiya qilish hamda yer uchastkalarini almashish bo‘yicha erishilgan kelishuvlar doirasida Chon-Gara va Tosh-Dobo qishloqlarini topshirish yuzasidan tashkiliy va texnik ishlarni boshladi.
24.kg nashrining ma’lum qilishicha, ushbu jarayon ilgari Farg‘ona viloyati tarkibida bo‘lgan Chon-Gara va Tosh-Dobo qishloqlarini rasmiy topshirish bo‘yicha amalga oshirilmoqda.
24-iyul kuni Qadamjoy tumanida ikki davlat qo‘shma ishchi komissiyasining navbatdagi yig‘ilishi o‘tkazilib, hudud aholisi fuqaroligi, ko‘chirish, mulkiy masalalar hamda boshqa tashkiliy jarayonlar muhokama qilingan.
3-avgustdan boshlab qo‘shma ishchi guruhlar bevosita qishloqlarda ish boshlagan. Mutaxassislar aholini ro‘yxatga olish, hujjatlarni rasmiylashtirish hamda keyingi tartib-taomillar bo‘yicha tushuntirish ishlarini olib bormoqda.
Qirg‘iziston delegatsiyasiga Prezidentning Botken viloyatidagi vakolatli vakili birinchi o‘rinbosari Baktibek Toksonbayev, O‘zbekiston delegatsiyasiga esa Ichki ishlar vazirligi Migratsiya va shaxsiylashtirish departamenti boshlig‘i o‘rinbosari Behzod Sayfullayev rahbarlik qilmoqda.
Dastlabki ma’lumotlarga ko‘ra, Chon-Gara va Tosh-Dobo qishloqlarida qariyb 2,5 ming kishi istiqomat qiladi. Aholini ro‘yxatga olish ishlari yakunlangach, ularga Qirg‘iziston fuqaroligini berish bo‘yicha belgilangan tartiblar boshlanadi.
Kelishuvga muvofiq, Qirg‘iziston O‘zbekistonga teng maydondagi yer uchastkalarini taqdim etadi.
