O‘zbekiston xalq shoiri Sharifa Salimova vafot etdi
Shoira jurnalistika, adabiyot va davlat boshqaruvi tizimida uzoq yillar samarali faoliyat yuritgan.
O‘zbekiston xalq shoiri, taniqli adiba va jamoat arbobi Sharifa Salimova 5-avgust kuni 75 yoshida vafot etdi. Bu haqda O‘zbekiston Yozuvchilar uyushmasi axborot xizmati ma’lum qildi.
Sharifa Salimova 1951-yil 30-dekabrda Toshkent viloyatining Parkent tumanida tavallud topgan. Toshkent davlat universitetining jurnalistika fakultetini tamomlagach, O‘zbekiston televideniyesi va radio tizimida, shuningdek, “Saodat” jurnali hamda “O‘zbekiston adabiyoti va san’ati” haftaligida faoliyat yuritgan.
Faoliyati davomida Prezident devoni, Oliy Majlis tizimida mas’ul lavozimlarda ishlagan, deputat sifatida ham samarali faoliyat olib borgan.
Shoiraning “Hayot zavqi”, “Mening bahorim”, “Xizr bulog‘i”, “Tongga qasam” kabi asarlari o‘zbek adabiyotida munosib o‘rin egallagan. Uning qator she’rlari xonanda Yulduz Usmonova ijrosida qo‘shiq sifatida ham keng ommalashgan.
Sharifa Salimova 1994-yilda “O‘zbekiston Respublikasida xizmat ko‘rsatgan madaniyat xodimi” unvoni, 2018-yilda “Mehnat shuhrati” ordeni bilan taqdirlangan. 2026-yil 28-may kuni esa unga “O‘zbekiston xalq shoiri” faxriy unvoni berilgan.
Ma’lum qilinishicha, marhumaning janoza namozi asr namozidan so‘ng Chig‘atoy masjidida o‘qiladi.
