O‘zbekistonning Istanbuldagi Bosh konsulxonasi fuqarolarni ehtiyotkor bo‘lishga chaqirdi
Diplomatik vakolatxona ma’lumotiga ko‘ra, Istanbulning gavjum sayyohlik maskanlarida pasport, pul va qo‘l sumkalarini o‘g‘irlash holatlari ko‘paygan.
O‘zbekistonning Istanbul shahridagi Bosh konsulxonasi Turkiyaga tashrif buyurayotgan fuqarolarni hushyor va ehtiyotkor bo‘lishga chaqirdi.
Ma’lum qilinishicha, so‘nggi vaqtlarda Istanbulning sayyohlar gavjum bo‘ladigan hududlarida, xususan Sulton Ahmad va Aya Sofiya atrofida qo‘l sumkalari, pasport, naqd pul hamda boshqa qimmatbaho buyumlarni o‘g‘irlash holatlari ko‘paygan.
Kuzatuv kameralari tasvirlari va o‘rganishlarga ko‘ra, ayrim holatlarda o‘g‘riliklar voyaga yetmagan shaxslar tomonidan sodir etilmoqda. Ularning yoshi sababli qonunchilikda nazarda tutilgan choralarni qo‘llash muayyan vaqt talab qilishi qayd etilgan.
Shu munosabat bilan Bosh konsulxona fuqarolarga qo‘l sumkasini doimo nazoratda saqlash, pasport va pulni bir joyda olib yurmaslik, gavjum maskanlarda hushyor bo‘lish hamda zarurat bo‘lmasa, katta miqdordagi naqd pul olib yurmaslikni tavsiya etdi.
Shuningdek, o‘g‘rilik holatiga duch kelgan fuqarolarga zudlik bilan Turkiya huquqni muhofaza qiluvchi organlariga murojaat qilish va O‘zbekistonning Istanbuldagi Bosh konsulxonasini xabardor qilish tavsiya etildi.
