Rossiyaning Kiyevga hujumlari oqibatida 15 kishi halok bo‘ldi
Kiyev viloyatidagi hujumlarda Brovari, Bucha va Fastiv tumanlari eng ko‘p zarar ko‘rgan hududlar sifatida qayd etildi.
Rossiya armiyasi tomonidan Kiyev shahri va Kiyev viloyatiga ballistik raketalar hamda dronlar yordamida amalga oshirilgan keng ko‘lamli hujumlar oqibatida kamida 15 kishi halok bo‘ldi, 48 kishi esa turli darajada tan jarohati oldi.
Ukraina Favqulodda vaziyatlar davlat xizmati ma’lumotlariga ko‘ra, Kiyev viloyatida 14 nafar tinch aholi halok bo‘lgan. Eng ko‘p qurbon Brovari tumanida qayd etilib, u yerda 9 kishi vafot etgan. Bucha tumanida 4 nafar, Fastiv tumanida esa 1 nafar fuqaro halok bo‘lgan.
Viloyatda 22 kishi jarohat olgan bo‘lib, Brovari tumanida 12 nafar, Bucha tumanida 7 nafar va Fastiv tumanida 3 nafar fuqaro tibbiy yordamga muhtoj bo‘lgan.
Kiyev shahrining Golosevskiy, Obolonskiy, Desnyanskiy va Svyatoshinskiy tumanlarida ham zarbalar oqibatlari qayd etildi. Turar joy binolari, omborxonalar, logistika markazlari va boshqa fuqarolik infratuzilmasi zarar ko‘rdi, bir nechta yirik yong‘inlar yuzaga keldi.
Favqulodda vaziyatlarni bartaraf etish ishlariga yuzlab qutqaruvchilar va maxsus texnikalar jalb qilingan. Jarohatlanganlarga zarur tibbiy yordam ko‘rsatilmoqda.
