Surxondaryoda 11 yoshli o‘g‘lini sotishga uringan ayol 3,5 yilga qamaldi
Ayol o‘g‘lini 40 million so‘mga berishga kelishgan va 20 million so‘mni olayotgan vaqtida qo‘lga olingan.
Surxondaryo viloyatida 11 yoshli o‘g‘lini 40 million so‘m evaziga sotishga uringan ayolga nisbatan sud hukmi e’lon qilindi.
Sud hujjatlariga ko‘ra, ayblanuvchi o‘ziga tanish ayol bilan 2014-yilda tug‘ilgan o‘g‘lini 40 million so‘mga berishga kelishgan. Tomonlar mablag‘ning 20 million so‘mi oldindan, qolgan qismi esa bola xaridor nomiga rasmiylashtirilgach to‘lanishiga kelishib olgan.
2026-yil 4-aprel kuni Termiz shahrida o‘tkazilgan tezkor tadbir davomida ayol oldindan kelishilgan 20 million so‘mni olgan vaqtida ashyoviy dalillar bilan qo‘lga olingan.
Sud jarayonida ayol qilmishini og‘ir moddiy ahvoli, qarzlari, uy-joyi yo‘qligi va oilaviy muammolar bilan izohlab, aybiga iqror bo‘lgan.
Ma’lum bo‘lishicha, bolani olishi kerak bo‘lgan ayol ushbu taklif noqonuniy ekanini anglab, huquqni muhofaza qiluvchi organlarga murojaat qilgan. Shundan so‘ng tezkor tadbir tashkil etilgan.
Sud ayolni Jinoyat kodeksining 135-moddasi 3-qismi "b" bandi (odam savdosi) bilan aybli deb topib, Jinoyat kodeksining 57-moddasi qo‘llangan holda 3 yil 6 oy muddatga ozodlikdan mahrum qilish jazosini tayinladi.
Shuningdek, bolaning vasiyligini belgilash masalasi vakolatli davlat organlari zimmasiga yuklatildi.
