Toshkent viloyatida bolasining tagligiga oltin yashirib olib o‘tishga uringan ayol ushlandi
Yana bir holatda chet ellik ayol 14 yoshli qizining kiyimlari ostiga 40 ming dollarni yashirib, mamlakatdan olib chiqishga uringan.
Toshkent viloyatidagi “Navoiy” chegara bojxona postida bolalardan foydalanilgan holda oltin va xorijiy valyutani noqonuniy olib o‘tishga urinishlarning oldi olindi. Bu haqda Bojxona qo‘mitasi ma’lum qildi.
Qayd etilishicha, mamlakatdan chiqib ketayotgan ayollardan biri go‘dak farzandining tagligiga yashirilgan qariyb 200 gramm og‘irlikdagi 2 dona oltin quymani olib chiqishga uringan. Shuningdek, uning yonidan bojxona nazoratiga taqdim etilmagan 70 gramm zargarlik buyumlari ham aniqlangan.
Dastlabki hisob-kitoblarga ko‘ra, noqonuniy olib chiqishga uringan oltin buyumlarning umumiy qiymati 450 million so‘mni tashkil etadi.
Yana bir holatda esa qo‘shni davlat fuqarosi bo‘lgan ayol 14 yoshli qizining kiyimlari ostiga 40 ming AQSH dollarini yashirib, uni O‘zbekistondan olib chiqishga uringan vaqtida bojxona xodimlari tomonidan to‘xtatilgan.
Bojxona qo‘mitasi voyaga yetmaganlarni huquqbuzarliklarga jalb qilish ma’muriy javobgarlikni og‘irlashtiruvchi holat hisoblanishini, jinoyat sodir etishga jalb etish esa amaldagi qonunchilikka muvofiq jinoiy javobgarlikka sabab bo‘lishini eslatdi.
Mazkur holatlar yuzasidan bojxona surishtiruvlari davom ettirilmoqda.
