Toshkentdagi ko‘p qavatli uyda yong‘in chiqdi, 26 kishi evakuatsiya qilindi
Yong‘in qutqaruvchilar tomonidan qariyb 1,5 soatda o‘chirilgan.
Bugun, 5-avgust kuni Toshkent shahrining Olmazor tumani Usta Shirin ko‘chasida joylashgan ko‘p qavatli uyning 6-kirish yo‘lagidagi elektr qutisida yong‘in sodir bo‘ldi.
Favqulodda vaziyatlar vazirligi ma’lumotiga ko‘ra, hodisa haqida xabar soat 02:19 da kelib tushgan. Qutqaruv bo‘linmalari voqea joyiga soat 02:25 da yetib borib, yong‘in soat 03:58 da to‘liq bartaraf etilgan.
Yong‘in oqibatida kirish yo‘lagidagi taxminan 60 pogonometr elektr kabellari yonib zararlangan. Qutqaruvchilar tomonidan ko‘p qavatli uydan 26 nafar fuqaro xavfsiz hududga evakuatsiya qilingan.
Hodisa oqibatida jabrlanganlar qayd etilmagan. Ayni paytda yong‘inning kelib chiqish sababi va yetkazilgan moddiy zarar miqdori aniqlanmoqda.
