Toshkentdagi kotlovan o‘pirilgan hududda o‘nlab daraxt noqonuniy kesilgani aniqlandi
Mazkur qurilish maydonida noqonuniy kesilgan daraxtlar oqibatida tabiatga 605 million so‘m, keyingi holatda esa yana 218,3 million so‘m zarar yetkazilgani ma’lum qilindi.
Toshkent shahrining Olmazor tumanida 9 qavatli uy yonida mehmonxona qurilishi olib borilayotgan hududda ekologiya qonunchiligi talablari bir necha bor buzilgani aniqlandi. Bu haqda Toshkent shahar Ekologiya va iqlim o‘zgarishi bosh boshqarmasi ma’lum qildi.
Ma’lum qilinishicha, ijtimoiy tarmoqlarda Beruniy ko‘chasidagi sobiq “Karvonbank” binosi o‘rnida amalga oshirilayotgan qurilish ishlari oqibatida daraxtlar noqonuniy kesilayotgani va ularga zarar yetkazilayotgani yuzasidan murojaatlar tarqalgan. O‘rganishlar davomida ushbu qurilish obyektida ekologik qonunchilik talablari avval ham bir necha bor buzilgani aniqlangan.
Xususan, 2025-yil aprel oyida hududdagi 2 tup chinor belgilangan tartibdagi ruxsatnomasiz boshqa joyga ko‘chirib o‘tkazilgani uchun sud qarori bilan huquqbuzarga 24,7 million so‘m jarima hamda 6,6 million so‘m ekologik zarar undirilgan.
Shuningdek, oradan bir hafta o‘tib, yana 14 tup chinor noqonuniy ko‘chirilishi oqibatida shikastlangani aniqlanib, sud qarori bilan 9,3 million so‘m jarima va 42 million so‘m miqdorida zarar undirilgan.
2025-yil dekabr oyida esa mazkur qurilish maydonida 6 tup chinor, 3 tup archa va 1 tup sofora noqonuniy kesilgani oqibatida tabiatga 605 million so‘m zarar yetkazilgani aniqlangan. Mazkur holat yuzasidan hujjatlar huquqiy baho berish uchun Bosh prokuraturaga yuborilgan. Sud tomonidan zarar summasini undirish haqida qaror qabul qilingan bo‘lsa-da, ushbu mablag‘ hozirgacha qoplanmagani sababli hujjatlar Majburiy ijro byurosiga yuborilgan.
Bundan tashqari, 2026-yil 13-iyul kuni o‘tkazilgan navbatdagi nazorat tadbirida yana 3 tup chinor tag qismidan noqonuniy kesilgani aniqlanib, huquqbuzarga nisbatan 10,3 million so‘m jarima qo‘llash hamda 218,3 million so‘m ekologik zarar undirish yuzasidan sudga da’vo arizasi kiritilgan.
Qayd etilishicha, 2024-yilda mazkur hudud xatlovdan o‘tkazilganda jami 46 tup daraxt mavjudligi qayd etilgan. Shuningdek, ekologik talablar buzilgani va fuqarolarning murojaatlari asosida qurilish uchun berilgan davlat ekologik ekspertizasi xulosasini bekor qilish yuzasidan ham tegishli murojaat yuborilgan.
Ekologiya boshqarmasi mazkur qurilish obyektida ilgari ham bir necha bor ma’muriy choralar qo‘llanilgani, sud qarorlari chiqarilgani va huquqni muhofaza qiluvchi organlarga hujjatlar yuborilganiga qaramay, ekologik qonunbuzarliklar takrorlangani qayd etildi.
Hozirda holat yuzasidan nazorat tadbirlari davom ettirilmoqda.
