Infantino uzr so‘radi
FIFA Jahon chempionati tijorat huquqlarini xususiy investorlarga sotish bo‘yicha bekor qilingan tashabbus yuzasidan yo‘l qo‘yilgan xatolarni tan olgan.
FIFA Marokashda o‘tkazilgan favqulodda yig‘ilish yakunida Jahon chempionati tijorat huquqlarining 20 foizini 4,2 milliard dollarga xususiy investorlarga sotish bo‘yicha bekor qilingan tashabbus sabab tashkilot a'zolaridan rasman uzr so‘radi. Bayonotda loyiha tayyorlanishi va muhokama qilinishi jarayonida milliy futbol assotsiatsiyalari yetarli darajada jalb etilmagani tan olingan. Bu haqda Reuters xabar berdi.
Yig‘ilishda FIFA prezidenti Janni Infantino, bosh kotib Mattias Grafstryom, operatsion direktor Kevin Lamur hamda tashkilotning boshqa yuqori martabali rahbarlari ishtirok etgan. Rahbariyat tijorat huquqlarini sotish tashabbusi yuzasidan yuzaga kelgan noroziliklarni muhokama qilib, kelgusida shunday muhim qarorlar yanada shaffof tartibda qabul qilinishini bildirgan.
FIFA bayonotida tashkilot rahbariyati Infantinoni qo‘llab-quvvatlashda davom etayotgani ham ta'kidlagan. Shu bilan birga, bosh kotib Mattias Grafstryom va operatsion direktor Kevin Lamur loyiha amalga oshirilish usuli ko‘ngildagidek bo‘lmaganini tan olib, bu jarayon tashkilot ichida ham norozilik uyg‘otganini qayd etgan.
Jahon chempionati tijorat huquqlarining bir qismini sotish rejasi UEFA, CONCACAF, Osiyo futbol konfederatsiyasi hamda Yevropaning qator klublari tomonidan keskin tanqid qilingan edi. Mojaro ortidan ayrim futbol amaldorlari Janni Infantinoning iste'fosini talab qilgan. Biroq, FIFA prezidenti Afrika, Osiyo va Okeaniyadagi ko‘plab milliy assotsiatsiyalar qo‘llovini saqlab qolmoqda. Hozircha 2027-yil mart oyida bo‘lib o‘tadigan FIFA prezidentligi saylovida unga qarshi yagona kuchli nomzod ham topilmagan.
