"Mikrobiznesdan yirik loyihalarga": Biznesni rivojlantirish banki tadbirkorlar bilan uchrashdi
Yangiyo‘lda Biznesni rivojlantirish banki hamda O‘zbekiston mahallalari uyushmasi hamkorligida o‘tkazilgan ochiq muloqotda tadbirkorlikni moliyalashtirish, imtiyozli kreditlar, davlat dasturlari va biznesni kengaytirish masalalari muhokama qilinib, tadbirkorlarning murojaatlariga amaliy yechimlar ishlab chiqildi.
Toshkent viloyati Yangiyo‘l tumanidagi “Xalqobod” mahallasida “Mikrobiznesdan yirik loyihalarga: mahalladagi tadbirkorlikni moliyaviy qo‘llab-quvvatlash” mavzusida davra suhbati o‘tkazildi.
Mazkur tadbir O‘zbekiston davlat mustaqilligining 35 yilligi munosabati bilan e’lon qilingan “Mahallada obodlik va mehr-saxovat oyligi” hamda “Dolzarb 40 kunlik” tadbirlari doirasida Biznesni rivojlantirish banki, O‘zbekiston mahallalar uyushmasi va Yangiyo‘l tumani hokimligi hamkorligida tashkil etildi.
Unda Biznesni rivojlantirish banki va O‘zbekiston mahallalar uyushmasi mutasaddilari, Yangiyo‘l tumani hokimligi vakillari, bank mutaxassislari, mahalliy tadbirkorlar hamda ommaviy axborot vositalari vakillari ishtirok etdi.
Uchrashuvdan ko‘zlangan asosiy maqsad mahallalarda tadbirkorlikni rivojlantirish, biznes subyektlarini moliyaviy qo‘llab-quvvatlash, bank xizmatlaridan foydalanish imkoniyatlarini kengaytirish, tadbirkorlarni qiynayotgan muammolarni bevosita tinglash hamda ularga amaliy yechimlar ishlab chiqishdan iborat bo‘ldi.
Tadbir avvalida ishtirokchilarga Biznesni rivojlantirish banki tomonidan taqdim etilayotgan moliyaviy mahsulotlar va xizmatlar ko‘rgazmasi namoyish etildi. Shuningdek, tadbirkorlikni qo‘llab-quvvatlashga oid axborot materiallari tarqatildi.
Davra suhbati davomida tadbirkorlikni moliyalashtirish imkoniyatlari, imtiyozli kredit mahsulotlari, davlat dasturlari, mahallabay ishlash tizimi hamda hududning iqtisodiy salohiyatidan samarali foydalanish masalalari yuzasidan taqdimotlar o‘tkazildi.
Ochiq muloqot formatida tashkil etilgan uchrashuvda tadbirkorlar kredit ajratish tartibi, garov ta’minoti, ruxsatnomalar olish, biznes faoliyatini kengaytirish va davlat tomonidan yaratilayotgan imkoniyatlar bo‘yicha o‘zlarini qiziqtirgan savollarni mutaxassislarga yo‘llab, batafsil javob oldilar. Qator murojaatlar yuzasidan amaliy yechimlar belgilandi.
Tadbir yakunida tadbirkorlik subyektlarini moliyaviy qo‘llab-quvvatlash, yangi ish o‘rinlarini yaratish, hududlarda biznes muhitini yanada yaxshilash hamda bank va tadbirkorlar o‘rtasidagi ochiq muloqotni tizimli ravishda davom ettirish bo‘yicha ustuvor vazifalar belgilab olindi.
