Netanyaxu bilan ayrim masalalarda kelishmovchiliklar bor — Vens

 

AQSh vitse-prezidenti J. D. Vens Isroil Bosh vaziri Benyamin Netanyaxu bilan ayrim masalalarda fikrlar tafovuti mavjudligini tan oldi.

 

Fox News telekanaliga bergan intervyusida Vens AQSh va Isroil yaqin ittifoqchi davlatlar bo‘lsa-da, ayrim masalalarda qarashlar turlicha bo‘lishi tabiiy ekanini ta'kidlagan.

 

Uning so‘zlariga ko‘ra, AQSh manfaatlari Isroil manfaatlari bilan mos kelgan holatlarda ikki tomon umumiy maqsadlarga erishish yo‘llarini muhokama qiladi. Qarashlar bir-biridan farq qilgan vaziyatlarda esa bu masalalar ochiq va halol tarzda muhokama qilinadi.

 

Vens AQSh vitse-prezidenti sifatidagi asosiy vazifasi mamlakat manfaatlarini himoya qilish ekanini qayd etgan.. Shuningdek, u Eron bilan bog‘liq vaziyatni diplomatik yo‘l bilan hal etishga intilayotganini bildirib, bu jarayonda ba'zan oldinga siljish va ortga chekinishlar kuzatilishini ta'kidlagan.

 

Axios nashri avvalroq J. D. Vens va Benyamin Netanyaxu o‘rtasida Eron masalasi hamda diplomatik yondashuv bo‘yicha kelishmovchiliklar shaxsiy darajagacha yetgani haqida xabar bergan edi. Nashr ma'lumotiga ko‘ra, Netanyaxu Vensning Isroil hukumati faoliyati va Eron bilan bog‘liq siyosat yuzasidan bildirgan tanqidlaridan norozi bo‘lgan.

 

Biroq Vens so‘nggi suhbat chog‘ida Netanyaxu tomonidan unga nisbatan hech qanday bosim yoki keskin munosabat bo‘lmaganini ham alohida ta'kidlagan.