O‘zbekistonda pulli avtomobil yo‘llarini tashkil etish tartibi belgilandi
Pulli avtomobil yo‘llaridan foydalanish uchun haydovchilar operator bilan ommaviy shartnoma tuzadi.
O‘zbekistonda pulli avtomobil yo‘llarini qurish, rekonstruksiya qilish va ulardan foydalanishni tashkil etish tartibi qonun bilan belgilandi. Bu haqda Adliya vazirligi xabar berdi.
Qonunga muvofiq, avtomobil yo‘llarini ta’mirlash va saqlash ishlari yo‘l egalari tomonidan, zaruratga ko‘ra ixtisoslashgan yo‘l tashkilotlarini jalb etgan holda amalga oshiriladi.
Shuningdek, yirik gabaritli va og‘ir vaznli transport vositalarining avtomobil yo‘llarida harakatlanishiga faqat maxsus vakolatli organ yoki uning tizimidagi idoralar tomonidan berilgan maxsus ruxsatnoma mavjud bo‘lgan taqdirda ruxsat etiladi.
Qonunga ko‘ra, pulli avtomobil yo‘llarini qurish, rekonstruksiya qilish va ulardan foydalanish to‘g‘risidagi qaror O‘zbekiston Prezidenti yoki o‘z vakolatlari doirasida Vazirlar Mahkamasi tomonidan qabul qilinadi.
Bunda pulli yo‘l tashkil etish faqat rejalashtirilayotgan yo‘l bilan bog‘liq hududlar o‘rtasida foydalanish uchun qulay va talab darajasidagi muqobil bepul avtomobil yo‘li mavjud bo‘lishi sharti bilan amalga oshiriladi.
Foydalanuvchilar pulli avtomobil yo‘lidan foydalanish uchun operator bilan ommaviy shartnomani quyidagi usullardan biri orqali tuzadi:
-
pulli avtomobil yo‘liga kirish;
-
harakatlanish uchun to‘lovni to‘lov punktida amalga oshirish;
-
yo‘l talonini xarid qilish.
Qonunda qayd etilishicha, pulli avtomobil yo‘llaridan foydalanish uchun to‘lov transport vositalarining yuqori tezlikda harakatlanishi hamda butun yo‘nalish bo‘ylab yuqori darajadagi servis xizmatlarini ta’minlash sharti bilan joriy etiladi.
