Pokistonning sobiq vaziri pedofiliyada gumonlanmoqda — The Guardian

 

Pokistonning Azad Kashmir hududi sobiq vaziri Ruxsar Ahmad Buyuk Britaniyada 1990-yillarda Manchester shahrida bolalarga nisbatan sodir etilgani aytilayotgan jinsiy zo‘ravonlik va odam savdosi bilan bog‘liq jinoyatlar yuzasidan tergov qilinmoqda. Bu haqda The Guardian nashri o‘z manbalariga tayanib xabar berdi.

 

Nashr ma’lumotlariga ko‘ra, 62 yoshli Ruxsar Ahmad 2024-yil 18-iyul kuni Manchester aeroportida qo‘lga olingan. U uzoq yillar yashagan Rusholme hududida 1990-yillarning boshlarida bolalar uylarida tarbiyalangan qizlarga nisbatan sodir etilgan jinsiy zo‘ravonlik va odam savdosi bilan bog‘liq jinoyatlar yuzasidan so‘roq qilingan.

 

Tergov kamida ikki nafar ayolning bolalik davrida zo‘rlangani va odam savdosiga jalb etilgani haqidagi ko‘rsatmalariga asoslanmoqda. Hodisalar sodir bo‘lgan paytda Ruxsar Ahmad taxminan 30 yoshda bo‘lgani aytilmoqda.

 

Buyuk Manchester politsiyasi siyosatchining mamlakatni tark etishini cheklashni so‘ragan. Biroq sud 2024-yil iyul oyida garov shartlarini kuchaytirish haqidagi iltimosnomani rad etgan. Hozirda Ahmad garov evaziga ozodlikda bo‘lib, politsiya nazorati ostida qolmoqda.

 

Shunga qaramay, o‘tgan hafta u Pokiston bosh vaziri Shahboz Sharif partiyasi nomidan Azad Jammu va Kashmir qonunchilik assambleyasi deputatligiga saylangan.

 

Nashrning yozishicha, Ruxsar Ahmad o‘tgan oy Manchester politsiyasiga kelishi kerak edi. Biroq u sog‘lig‘i sabab Buyuk Britaniyaga ucha olmasligini ma’lum qilgan. Shu bilan birga, ijtimoiy tarmoqlarda uning Pokistonning Mirpur shahridagi saylovoldi tadbirlarida ishtirok etayotgani aks etgan suratlar tarqalgan.

 

Ma’lum qilinishicha, siyosatchi yaqin olti hafta ichida Manchester politsiyasiga kelishi kerak. Aks holda, unga nisbatan hibsga olish orderi chiqarilishi yoki ekstraditsiya jarayoni boshlanishi mumkin. The Guardian qayd etishicha, bu holat Buyuk Britaniya va Pokiston o‘rtasida diplomatik masalaga aylanishi ehtimolini ham yuzaga keltirishi mumkin.