Samarqandda elektr ta’minoti korxonasi rahbari 5 ming dollar pora bilan ushlandi
Toshkentda esa o‘qishga kiritib qo'yish evaziga 13 ming dollar olgan shaxs qo'lga tushdi.
Samarqand viloyati va Toshkent shahrida korrupsiya hamda firibgarlik bilan bog‘liq ikki holat fosh etildi. Bu haqda Davlat xavfsizlik xizmati ma’lum qildi.
Ma’lum qilinishicha, Samarqand viloyatidagi tumanlardan birining Elektr ta’minoti korxonasi rahbari mahalliy tadbirkorga tegishli umumiy ovqatlanish shoxobchasida elektr tarmog‘iga noqonuniy ulanish oqibatida davlatga yetkazilgan 393 million so‘mlik zarar bo‘yicha jinoiy javobgarlikka tortmaslik hamda zarar miqdorini kamaytirib, ma’muriy tartibda rasmiylashtirib berish evaziga 5 ming AQSH dollari talab qilgan.
U joriy yil iyul oyida ushbu mablag‘ning 4 ming dollarini olgan, qolgan 1 ming dollarni esa uchinchi shaxs orqali olayotgan vaqtida Davlat xavfsizlik xizmati hamda Bosh prokuratura huzuridagi Iqtisodiy jinoyatlarga qarshi kurashish departamenti xodimlari tomonidan qo‘lga olingan.
Qayd etilishicha, mazkur mansabdor avval ham sudlangan bo‘lishiga qaramay, yana noqonuniy harakat sodir etgan.
Yana bir holatda Toshkent shahrida yashovchi, 1988-yilda tug‘ilgan va muqaddam sudlangan shaxs o‘zining yuqori lavozimda ishlovchi tanishlari orqali fuqaroni Toshkent davlat iqtisodiyot universitetiga o‘qishga kiritib qo‘yish evaziga 20 ming AQSH dollari talab qilgan.
Tezkor tadbir davomida u oldindan 13 ming AQSH dollari olayotgan vaqtida ashyoviy dalillar bilan ushlandi.
Hozirda har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
