Shimoliy Koreya qisqa masofali ballistik raketa uchirdi

 
Shimoliy Koreya 6-avgust kuni sharqiy qirg‘oqdagi Vonsan hududidan qisqa masofali ballistik raketa uchirdi. Janubiy Koreya Birlashgan shtab boshliqlari qo‘mitasi raketa Yapon dengizi tomonga uchirilganini ma'lum qildi. Bu haqda Apnews xabar berdi.

 
Raketaning aniq uchish masofasi va texnik tavsiflari hozircha oshkor etilmagan. Janubiy Koreya harbiylari AQSH va Yaponiya bilan birgalikda raketa parvoziga oid ma'lumotlarni tahlil qilmoqda hamda kuzatuv va jangovar shaylik darajasini kuchaytirgan. Yaponiya Mudofaa vazirligi ham raketa mamlakat hududi yoki uning eksklyuziv iqtisodiy zonasiga tushmaganini tasdiqladi.

 
Shimoliy Koreya so‘nggi yillarda turli turdagi ballistik raketalar, qanotli raketalar, gipertovushli qurol tizimlari hamda suvosti kemalaridan uchiriladigan raketalarni muntazam sinovdan o‘tkazib kelmoqda. Pxenyan bu dasturlarni mamlakat mudofaa salohiyatini mustahkamlash zarurati bilan izohlab keladi. Mamlakat rahbari Kim Chen In yadroviy va raketa salohiyatini yanada kuchaytirishni davlat siyosatining ustuvor yo‘nalishlaridan biri sifatida belgilagan.

 
AQSH, Janubiy Koreya va Yaponiya esa bunday raketa uchirishlarini BMT Xavfsizlik kengashi rezolyutsiyalariga zid deb hisoblaydi. Shu sababli uch davlat harbiy va razvedka sohasidagi hamkorlikni kengaytirib, Koreya yarimorolida havo hujumidan mudofaa tizimlari hamda raketalarni erta aniqlash imkoniyatlarini kuchaytirishga alohida e'tibor qaratmoqda.