Shimoliy Koreya Rossiyaning Ukrainadagi urushida ishtirokini kengaytirmoqda

 
Rossiya va Shimoliy Koreya o‘rtasidagi harbiy hamkorlik so‘nggi ikki yil ichida sezilarli darajada kengaydi. G‘arb va Janubiy Koreya razvedka xizmatlari ma'lumotlariga ko‘ra, 2024-yil kuzidan boshlab Shimoliy Koreya Rossiyaga 14 mingga yaqin harbiy xizmatchi yuborgan. Ular asosan Rossiyaning Kursk viloyatida Ukraina qo‘shinlariga qarshi janglarda qatnashgan. Bu haqda Reuters xabar berdi.

 
Ukraina prezidenti Vladimir Zelenskiy iyul oyida Rossiya yana 30 ming nafargacha shimoliy koreyalik harbiyni urushga jalb etishni rejalashtirayotganini ma'lum qilgan. Janubiy Koreya razvedkasi ham Pxenyan qo‘shimcha kuchlar yuborishga tayyorlanayotganini bildirgan.

 
So‘nggi ma'lumotlarga ko‘ra, Shimoliy Koreya ilk bor ballistik raketa bo‘linmasini ham Rossiya hududiga yuborishni boshlagan. Ukraina harbiy razvedkasi bu bo‘linma oltita raketa uchirgichi va 120 tagacha ballistik raketa bilan jihozlanishi mumkinligini ma'lum qilgan. Bo‘linma Rossiyaning g‘arbiy qismida joylashtirilishi va Ukrainaga qarshi zarbalarda ishtirok etishi kutilmoqda.

 
Shimoliy Koreya urush davomida Rossiyani katta miqdorda artilleriya snaryadlari, raketalar va boshqa qurol-aslahalar bilan ham ta'minlab kelmoqda. G‘arb davlatlari va Ukraina rasmiylari bu yordam Rossiyaga uzoq davom etayotgan urushda qurol-yarog‘ zaxiralarini to‘ldirish imkonini berayotganini ta'kidlaydi.

 
Ma’lumot uchun, Moskva va Pxenyan 2024-yilda o‘zaro mudofaa to‘g‘risidagi shartnomani imzolagan. Shundan so‘ng ikki davlat o‘rtasidagi harbiy hamkorlik yanada chuqurlashdi. Rossiya 2025-yilda Shimoliy Koreya harbiylari Kursk viloyatidagi janglarda qatnashganini rasman tasdiqlagan bo‘lsa, Pxenyan ham bu ishtirokni o‘zaro mudofaa majburiyatlari doirasidagi harakat sifatida baholagan.