Tojikistonda hijobga qarshi navbatdagi “reyd”lar boshlandi
Rasmiylar tadbirni milliy qadriyatlarni asrash zarurati bilan izohlagan.
Tojikistonning Panjakent shahrida mahalliy hokimiyat va militsiya xodimlari o‘zlari “begona kiyim” deb atayotgan liboslarga qarshi navbatdagi tushuntirish tadbirlarini o‘tkazdi. 4-avgust kuni hukmron Xalq demokratik partiyasining Panjakent bo‘limi e'lon qilgan fotosuratlarga ko‘ra, uchrashuvlar asosan hijob kiygan ayollar va qizlar ishtirokida bo‘lib o‘tgan.
Rasmiylarning bildirishicha, tadbirdan ko‘zlangan maqsad “begona madaniyat kirib kelishining oldini olish”, milliy o‘zlikni mustahkamlash hamda milliy qadriyatlarni asrashdan iborat. Biroq tadbirda necha kishi qatnashgani, ayollarga qanday tavsiyalar yoki talablar bildirilgani haqida ma'lumot berilmagan.
Radio Ozodi ma'lumotiga ko‘ra, hokimiyat vakillari bilan suhbatlashgan ayrim hijobli ayollar voqea tafsilotlarini oshkor qilishni istamagan. Ular bu ish joyi yoki shaxsiy hayotida muammolar keltirib chiqarishidan xavotir bildirgan.
Qayd etilishicha, joriy yil may oyida ham Rudakiy tumanida “Qishloqdan qishloqqa” nomli shunga o‘xshash targ‘ibot tadbiri o‘tkazilgan. Muxolifat vakillarining ta'kidlashicha, bu uchrashuvlar “ixtiyoriy tushuntirish ishlari” sifatida taqdim etilgan bo‘lsa-da, hijob kiygan ayollar tuman hokimiyati binosiga chaqirilgan.
Ma’lumot uchun, 2024-yil iyun oyidan boshlab Tojikistonda “milliy madaniyatga yot” deb baholangan kiyimlarni olib kirish, sotish, reklama qilish va kiyish taqiqlangan. Biroq amaldagi qonunchilikda “begona kiyim” tushunchasiga aniq ta'rif berilmagan. Shu bilan birga, amaliyotda rasmiylar ushbu atama ostida asosan islomiy kiyinish uslubi, xususan hijobni nazarda tutayotgani qayd etib kelinadi.
