Toshkentda voyaga yetmagan bola do‘kondan 6,2 mln so‘m o‘g‘irladi
Qo‘riqlash xizmati xodimlari uni voqea joyida ushlab, pul mablag‘lari egasiga qaytarildi.
Toshkent shahrida voyaga yetmagan bola do‘kondan pul o‘g‘irlagani aniqlandi. Bu haqda Toshkent shahar IIBB xabar berdi.
Ma’lum qilinishicha, voyaga yetmagan bola do‘kon eshigi tirqishidan ichkariga kirib, kassada saqlanayotgan 6 million 185 ming so‘mga yaqin pul mablag‘ini o‘g‘irlab ketgan.
Hodisa tungi xizmatni olib borayotgan Qo‘riqlash xizmati xodimlari tomonidan o‘z vaqtida aniqlanib, gumonlanuvchi voqea joyidan chiqib ketayotganida qo‘lga olingan hamda ichki ishlar organlariga topshirilgan.
Tekshiruv davomida o‘g‘irlangan pul mablag‘lari to‘liq egalariga qaytarilgan.
O‘rganishlar chog‘ida mazkur savdo shoxobchasi Qo‘riqlash xizmati tizimiga ulanmagani aniqlanib, tadbirkor bilan tegishli shartnoma tuzilgan. Shuningdek, hududdagi boshqa savdo obyektlari ham ko‘zdan kechirilib, ularning egalariga mulk xavfsizligini ta’minlash, qo‘riqlash xizmatiga ulanish va jinoyatlarning oldini olish bo‘yicha tushuntirish ishlari olib borilgan.
Jinoyatni tezkor fosh etishda xizmat ko‘rsatgan Qo‘riqlash xizmati xodimlari rahbariyat tomonidan rag‘batlantirilgan.
