Toshkentdagi Kichik halqa yo‘lining bir qismi 10-avgustgacha yopiladi
Ta’mirlash ishlari davomida avtotransport vositalari qarama-qarshi yo‘nalish bo‘ylab harakatlanadi, tez tibbiy yordam mashinalari uchun esa alohida yo‘lak tashkil etiladi.
Toshkent shahrining Chilonzor tumanidagi Kichik halqa avtomobil yo‘lining Bunyodkor shoh ko‘chasi bilan Arnasoy ko‘chasi oralig‘idagi qismida qurilish-montaj ishlari olib borilishi munosabati bilan transport harakati vaqtincha cheklanadi.
Ma’lum qilinishicha, mazkur uchastkada avval yo‘lning qarama-qarshi tomonida kapital ta’mirlash va yangi asfalt qoplamasini yotqizish ishlari yakunlangan. Endilikda ta’mirlash ishlari yo‘lning ikkinchi tomonida davom ettiriladi.
Shu sababli 6-avgust soat 23:00 dan 10-avgust soat 08:00 gacha Kichik halqa avtomobil yo‘lining Bunyodkor shoh ko‘chasi bilan Arnasoy ko‘chasi oralig‘idagi ta’mirlanayotgan qismi transport harakati uchun vaqtincha yopiladi.
Bu davrda avtotransport vositalari oqimi yo‘lning qarama-qarshi tomoniga yo‘naltiriladi va harakat vaqtinchalik sxema asosida tashkil etiladi. Tez tibbiy yordam mashinalari uchun esa alohida vaqtinchalik harakat yo‘nalishi ajratiladi.
Mas’ullar haydovchilardan yo‘l belgilariga amal qilish, tezlikni pasaytirish hamda harakat yo‘nalishini oldindan rejalashtirishni so‘radi. Ta’kidlanishicha, cheklovlar yo‘lni sifatli kapital ta’mirlash va asfalt qoplamasini yotqizish ishlarini xavfsiz yakunlash maqsadida joriy etilmoqda.
