Toshkentdagi Milliy bog‘da 4 yoshli qiz cho‘kib vafot etdi
Holat yuzasidan sud-tibbiy ekspertiza tayinlanib, surishtiruv olib borilmoqda.
Toshkentdagi Milliy bog‘ sayilgohi hududidagi cho‘milish sohilida 4 yoshli qiz cho‘kib vafot etdi. Bu haqda Bosh prokuratura axborot xizmati rahbari Hayot Shamsutdinov ma’lum qildi.
Hodisa 5-avgust kuni soat taxminan 16:30 da Toshkent shahridagi Milliy bog‘ sayilgohi hududida joylashgan cho‘milish sohilida sodir bo‘lgan.
Dastlabki ma’lumotlarga ko‘ra, ayol 4 va 8 yoshli nabiralari bilan cho‘milish uchun mazkur hududga kelgan. Cho‘milish jarayonida 4 yoshli qiz suvga cho‘kib ketgan.
Voqea joyiga yetib kelgan tez tibbiy yordam xodimlari tomonidan bolaga birinchi tibbiy yordam ko‘rsatilgan. Biroq, ko‘rilgan barcha sa’y-harakatlarga qaramay, uning hayotini saqlab qolishning imkoni bo‘lmagan.
Ma’lum qilinishicha, marhumaning tanasida tashqi tan jarohatlari aniqlanmagan. Hodisa yuzasidan tergov-tezkor guruhi, prokuratura hamda Sud-tibbiy ekspertiza byurosi xodimlari tomonidan sud-tibbiy ekspertiza tayinlangan.
Hozirda qizning o‘lim sabablarini aniqlash maqsadida surishtiruv ishlari davom ettirilmoqda.
