Wildberries omborlarining bir qismini O‘zbekistonga ko‘chirishi mumkin
Shuningdek, kompaniya uzoq muddat saqlanadigan mahsulotlarning bir qismini Belarus, Qozog‘istondagi omborlarga yo‘naltirishni rejalashtirmoqda.
Rossiyaning eng yirik marketpleyslaridan biri Wildberries Ukraina dronlari hujumlari ortidan logistika tizimini qayta tashkil etishni boshladi. Kompaniya uzoq muddat saqlanadigan mahsulotlarni Belarus, Qozog‘iston va O‘zbekistondagi omborlarga yo‘naltirishni rejalashtirmoqda. Bu haqda The MoscowTimes xabar berdi.
Ma’lumotlarga ko‘ra, Rossiyadagi ombor quvvatlarining qariyb 20 foizi hujumlar oqibatida ishdan chiqqan. Shu sababli kompaniya xavfsizroq hududlardagi logistika markazlaridan foydalanishni kengaytirishni ko‘zlamoqda.
Wildberries vakillari sotuvchilar bilan o‘tkazilgan uchrashuvlarda uzoq muddatli saqlash omborlari endilikda asosan Belarus, Qozog‘iston va O‘zbekistonda joylashishini, yetkazib berish muddatlari hamda logistika xarajatlari bo‘yicha qo‘shimcha ma’lumotlar keyinchalik taqdim etilishini bildirgan.
Shu bilan birga, ayrim tadbirkorlar yangi logistika sxemasi yetkazib berish muddatlarini uzaytirishi, transport xarajatlarini oshirishi va bojxona rasmiylashtiruvi bilan bog‘liq qo‘shimcha muammolarni keltirib chiqarishi mumkinligini ta’kidlashmoqda.
Ma’lum qilinishicha, Wildberries Toshkent viloyatida 170 ming kvadrat metr maydonga ega yirik logistika markazini barpo etmoqda. Loyiha Rossiya, O‘zbekiston va Yaqin Sharq bozorlarini bog‘lash, shuningdek, Xitoy orqali Afrika yo‘nalishidagi tranzit logistikasini rivojlantirishga xizmat qilishi rejalashtirilgan.
Mutaxassislar hisob-kitobiga ko‘ra, Rossiyadagi Wildberries logistika infratuzilmasining 17–22 foizi turli darajada zarar ko‘rgan. Kompaniya logistika zanjirlarini qayta shakllantirish bilan birga, kichik omborlar va qabul punktlari tarmog‘idan kengroq foydalanishni boshlagan.
