“Bo‘rijar” kanalida cho‘kayotgan bolani qutqargan PPX xodimi va fuqaro taqdirlandi
Bolani qutqarishda jasorat ko‘rsatgan xodim va fuqaroning xizmatlari e’tirof etilib, ularga pul mukofoti hamda esdalik sovg‘alari topshirildi.
Toshkent shahar Ichki ishlar bosh boshqarmasi boshlig‘i Ravshan Sultanxodjayev ishtirokida Yakkasaroy tumani Ichki ishlar organlari faoliyatini muvofiqlashtirish boshqarmasida saf yig‘ilishi bo‘lib o‘tdi. Yakkasaroy tumani hokimligi matbuot xizmati xabar berdi.
Yig‘ilishda tumanda jamoat xavfsizligini ta’minlash, huquqbuzarliklarning oldini olish hamda fuqarolar osoyishtaligini mustahkamlash borasida amalga oshirilayotgan ishlar muhokama qilindi.
Tadbir yakunida inson hayotini saqlab qolishda jasorat va fidoyilik ko‘rsatgan fuqarolar munosib taqdirlandi.
Xususan, “Bo‘rijar” kanalida cho‘milish vaqtida cho‘kayotgan 13 yoshli Muhamadni qutqarib qolgan Yakkasaroy tumani IIO FMB Post-patrul xizmati inspektori Rasul Jo‘rayevning tezkor harakati alohida e’tirof etildi. Shuningdek, qutqaruv jarayonida yordam ko‘rsatgan fuqaro Zuxriddin Eshquvvatovning jasorati ham munosib baholandi.
Ularning inson hayotini asrab qolish yo‘lidagi fidokorona harakatlari uchun Toshkent shahar IIBB boshlig‘i Ravshan Sultanxodjayev hamda Yakkasaroy tumani hokimi Nilufar Allabergenova tomonidan tashakkurnoma, pul mukofoti va esdalik sovg‘alari topshirildi.
