Olmaotada insultni boshdan kechirgan o‘zbekistonlik ayol vatanga qaytarildi
Ayolga Qozog‘iston fuqarosi tomonidan yashash joyi, oziq-ovqat, kiyim-kechak va hujjatlarni rasmiylashtirishda bepul ko‘mak berilgan.
O‘zbekistonning Olmaotadagi Bosh konsulligi ko‘magida Qozog‘istonda mehnat faoliyatini olib borayotgan vaqtida insultni boshdan kechirgan ayol O‘zbekistonga qaytarildi. Bu haqda Dunyo axborot agentligi xabar berdi.
Ma’lum qilinishicha, fuqaroning murojaati va uning og‘ir salomatlik holati inobatga olinib, Bosh konsullik tomonidan O‘zbekistonga qaytishi uchun qaytish sertifikati rasmiylashtirilgan hamda Olmaota–Toshkent yo‘nalishi bo‘yicha aviachipta xarid qilishda amaliy yordam ko‘rsatilgan.
Shuningdek, Qozog‘istonning vakolatli huquqni muhofaza qiluvchi va migratsiya organlari bilan hamkorlikda oʻzbekistonlik fuqaroning mamlakatdan qonuniy tartibda chiqib ketishi ta’minlangan.
Mazkur jarayonda Qozog‘iston fuqarolaridan biri ayolga bepul yordam ko‘rsatib, uni vaqtincha yashash joyi, kiyim-kechak va oziq-ovqat bilan ta’minlagani, zarur hujjatlarni rasmiylashtirish hamda boshqa ijtimoiy-maishiy masalalarni hal etishda ko‘maklashgani uchun Bosh konsullik unga minnatdorlik bildirgan.
