Quvayt mamlakatdagi yagona Eron maktabini yopdi
Rasmiy sabab ochiqlanmagan bo‘lsa-da, qaror mintaqadagi keskin geosiyosiy vaziyat fonida qabul qilingani qayd etilmoqda.
Quvayt Ta’lim vazirligi mamlakatdagi yagona Eron maktabi faoliyatini to‘xtatish hamda uning ta’lim litsenziyasini bekor qilish to‘g‘risida qaror qabul qildi. Bu haqda AFP agentligi vazirlikdagi manbaga tayanib xabar berdi.
Ma’lum qilinishicha, mazkur qaror ortidan maktabga yangi o‘quvchilarni qabul qilish to‘xtatilgan, ota-onalarga esa farzandlarini boshqa ta’lim muassasalariga o‘tkazish tavsiya etilgan.
Rasmiy hujjatda maktabning yopilish sabablari ochiqlanmagan. Biroq AFP manbalariga ko‘ra, qaror Eron va mintaqadagi davlatlar o‘rtasidagi keskinlik kuchaygan, shuningdek, AQSH harbiylari joylashgan Fors ko‘rfazi davlatlariga qilingan hujumlar fonida qabul qilingan.
Quvayt rasmiylari ushbu qaror yuzasidan qo‘shimcha izoh bermagan.
