Samarqandda yuk mashinasi ag‘darilib ketdi, haydovchi halok bo‘ldi
Yuk mashinasi kabinasida yong‘in chiqishi ortidan haydovchi boshqaruvni yo‘qotib, beton to‘siqqa urilgan.
6-avgust kuni soat 16:00 atrofida Samarqand viloyatining Nurobod tumanidagi A-378 avtomobil yo‘lining 35-kilometrida og‘ir yo‘l-transport hodisasi sodir bo‘lgan. Viloyat Yo‘l harakati xavfsizligi boshqarmasi ma’lumotiga ko‘ra, MAN rusumli yuk avtomobili Samarqand–Qashqadaryo yo‘nalishi bo‘ylab harakatlanayotgan vaqtda transport vositasi kabinasining salon qismida to‘satdan yong‘in kelib chiqqan.
Haydovchi avtomobilni to‘xtatishga uringan, biroq boshqaruvni yo‘qotgan. Oqibatda yuk mashinasi yo‘lning chap tomonidagi beton to‘siqqa urilib, ag‘darilib ketgan.
Hodisa oqibatida haydovchi og‘ir tan jarohatlari olib, voqea joyining o‘zida vafot etgan.
Mazkur holat yuzasidan Nurobod tumani IIB Tergov bo‘limi tomonidan jinoyat ishi qo‘zg‘atilgan. Hozirda hodisaning kelib chiqish sabablari va barcha holatlarni aniqlash bo‘yicha tergov harakatlari davom ettirilmoqda.
