Saudiya Arabistoni, Turkiya va Pokiston qo‘shma mudofaa kelishuvini imzoladi
Tomonlar bir davlatga qarshi qurolli hujumni uchalasiga qarshi hujum sifatida ko‘rishga kelishdi.
Saudiya Arabistoni, Turkiya va Pokiston o‘rtasida jamoaviy mudofaa va harbiy hamkorlikni mustahkamlashga qaratilgan qo‘shma mudofaa kelishuvi imzolandi.
Kelishuv Jidda shahrida Saudiya Arabistoni valiahd shahzodasi Muhammad bin Salmon, Turkiya prezidenti Rajab Toyyib Erdo‘g‘an va Pokiston bosh vaziri Shahboz Sharif ishtirokidagi uchrashuvlar doirasida tuzildi.
Hujjatga ko‘ra, uch davlatdan biriga uyushtirilgan qurolli hujum barcha a’zo davlatlarga qarshi hujum sifatida baholanadi. Shu orqali tomonlar o‘zaro xavfsizlik va mudofaa sohasidagi hamkorlikni yangi bosqichga olib chiqishni maqsad qilgan.
Kelishuv doirasida harbiy hamkorlikni kengaytirish, xavfsizlik masalalarida o‘zaro muvofiqlashtirishni kuchaytirish hamda umumiy tahdidlarga qarshi hamkorlikda harakat qilish ko‘zda tutilmoqda.
Kelishuvning imzolanishi Yaqin Sharq va Fors ko‘rfazi mintaqasida harbiy-siyosiy keskinlik kuchayib borayotgan bir paytga to‘g‘ri kelmoqda. Mintaqadagi so‘nggi voqealar uch davlat o‘rtasidagi xavfsizlik bo‘yicha muzokaralarni jadallashtirgan.
Saudiya Arabistoni va Pokiston o‘rtasidagi mudofaa aloqalari 2025-yilda imzolangan strategik mudofaa kelishuvidan keyin yanada mustahkamlangan edi. Yangi uch tomonlama kelishuv esa Anqara, Ar-Riyod va Islomobod o‘rtasidagi xavfsizlik hamkorligini kengaytirishi kutilmoqda.
