Sun’iy intellekt yordamida tabiatda uchramaydigan viruslar yaratildi
AQSH olimlari sun'iy intellekt yordamida tabiatda mavjud bo‘lmagan 16 ta yangi virusni yaratishga muvaffaq bo‘ldi.
AQSH olimlari sun’iy intellektdan foydalanib, tabiatda mavjud bo‘lmagan 16 ta yangi virus yaratishga muvaffaq bo‘ldi. Bu haqda AlJazeera xabar berdi.
Tadqiqotni Stenford universiteti va Arc Institute olimlari amalga oshirgan. Ular Evo 1 va Evo 2 nomli sun’iy intellekt modellaridan foydalanib, tabiatda uchramaydigan minglab virus genomlarini loyihalashtirgan. Laboratoriya sinovlarida ulardan 16 tasi funksional ekani tasdiqlanib, E.coli bakteriyalarini yuqtirish va yo‘q qilish qobiliyatini namoyish etgan.
Yaratilgan viruslar bakteriofaglar bo‘lib, ular faqat bakteriyalarni zararlaydi va odamlarga xavf tug‘dirmaydi. Olimlar bunday texnologiya antibiotiklarga chidamli infeksiyalarni davolash, individual bemor uchun mos bakteriofaglarni tez yaratish hamda yangi biologik terapiyalarni ishlab chiqishda muhim ahamiyat kasb etishini ta’kidlamoqda.
Shu bilan birga, bioxavfsizlik bo‘yicha mutaxassislar sun’iy intellektning virus genomlarini yaratish imkoniyati kelajakda zararli maqsadlarda ham qo‘llanishi mumkinligidan xavotir bildirmoqda. Ularning fikricha, bunday texnologiyalar rivojlanishi bilan nazorat mexanizmlari, DNK sintezi ustidan monitoring va xalqaro xavfsizlik qoidalarini kuchaytirish zarurati ortmoqda.
Tadqiqot mualliflari esa loyiha davomida faqat odamlarga xavf tug‘dirmaydigan bakteriofaglar bilan ishlanganini, barcha tajribalar bioxavfsizlik talablariga muvofiq o‘tkazilganini bildirgan. Ularning aytishicha, sun'iy intellekt biologiya va tibbiyotda yangi imkoniyatlar yaratishi mumkin, biroq undan foydalanish qat'iy nazorat va xalqaro hamkorlikni talab qiladi.
