Tailanddagi maktabda otishma sodir bo‘ldi
Qurbonlar orasida uch nafar o‘qituvchi va uch nafar o‘quvchi bor.
Tailandning Nonthaburi provinsiyasidagi Debsirin Nonthaburi maktabida sodir bo‘lgan otishmada olti kishi halok bo‘ldi, 15 kishi jarohatlandi. Mamlakat rasmiylari ma'lumotiga ko‘ra, hujumni maktab o‘quvchisi amalga oshirgan. Bu haqda ApNews xabar berdi.
Halok bo‘lganlar orasida uch nafar o‘qituvchi va uch nafar o‘quvchi bor. Jarohatlanganlarning ikki nafari og‘ir ahvolda shifoxonaga yotqizilgan. Gumonlanuvchi ham voqeadan so‘ng og‘ir yaralangan holda kasalxonaga olib ketilgan. Dastlabki ma'lumotlarga ko‘ra, u qurolni oila a'zolaridan biriga tegishli quroldan foydalangan.
Otishma vaqtida maktab binosida vahima yuzaga kelgan. O‘quvchilar va o‘qituvchilar sinfxonalarda yashiringan, ayrimlari derazalar orqali tashqariga qochishga majbur bo‘lgan. Politsiya hududni o‘rab olib, binoni bosqichma-bosqich evakuatsiya qilgan.
Bosh vazir Anutin Charnvirakul qurbonlarning oila a'zolariga hamdardlik bildirib, voqea sabablarini har tomonlama o‘rganish hamda jabrlanganlarga zarur yordam ko‘rsatish bo‘yicha topshiriq berdi. Huquq-tartibot organlari hujum motivi va qurol maktabga qanday olib kirilgani yuzasidan tergovni davom ettirmoqda.
Eslatib o‘tamiz, joriy yil fevral oyida mamlakat janubidagi maktablardan birida ham otishma sodir bo‘lgan edi. Oqibatda bir kishi halok bo‘lib, yana ikki kishi yaralangan.
