Toshkentda ayolning intim suratlarni tarqatmaslik evaziga 3 ming dollar talab qilgan erkak ushlandi
U suratlarni ayolning oila a’zolariga ko‘rsatish va tarqatish bilan tahdid qilib, pul talab qilgan.
Toshkent shahrida ayolning shaxsiy foto va videolarini tarqatib yuborish hamda ularni oila a’zolariga ko‘rsatish bilan tahdid qilib, undan pul talab qilgan shaxs qo‘lga olindi. Bu haqda Ichki ishlar vazirligi matbuot xizmati xabar berdi.
Ma'lum qilinishicha, 1999-yilda tug‘ilgan ayol ichki ishlar organlariga murojaat qilib, 1995-yilda tug‘ilgan erkak uning turli vaqtlarda olingan intim foto va videolarini tarqatmaslik, shuningdek, oila a’zolariga ko‘rsatib sharmanda qilmaslik evaziga undan qariyb 3 ming AQSH dollari talab qilib kelayotganini bildirgan.
Murojaat asosida ichki ishlar organlarining Tezkor qidiruv departamenti va hududiy bo‘linmalari xodimlari tomonidan tezkor tadbir o‘tkazilgan.
Tadbir davomida gumonlanuvchi Toshkent shahrining Mirobod tumanida ayoldan talab qilgan 3 ming AQSH dollarini olayotgan vaqtida ashyoviy dalillar bilan ushlangan.
Mazkur holat yuzasidan unga nisbatan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilgan. Hozirda tergov harakatlari olib borilmoqda.
