Tramp AQShda “tug‘ilish turizmi”ga chek qo‘ydi

 

AQSh prezidenti Donald Tramp mamlakatga farzand tug‘ish maqsadida kelib, chaqaloqning tug‘ilishi orqali avtomatik ravishda AQSh fuqaroligini olish amaliyoti — “tug‘ilish turizmi”ni taqiqlovchi farmonni imzoladi.

 

Bu haqda Oq uy apparati rahbari o‘rinbosari Stiven Miller farmon imzolanishi marosimida ma’lum qildi.

 

Trampning so‘zlariga ko‘ra, ayrim shaxslar AQShda tug‘ilish orqali fuqarolik olish imkoniyatidan tijoriy maqsadlarda foydalanmoqda. Prezident bunday amaliyot “shunday ishlashi kerak emasligi”ni ta’kidlagan.

 

Farmon, shuningdek, tug‘ilish orqali avtomatik fuqarolik olish huquqiga ega bo‘lmaydigan shaxslar doirasini kengaytiradi. Unga ko‘ra, AQShning xorijiy dushmanlari, xorijiy terroristik tashkilotlar a’zolari hamda ayrim xorijiy hukumatlar nomidan faoliyat yurituvchi shaxslarning farzandlariga nisbatan fuqarolik berish tartibiga cheklovlar qo‘yiladi.

 

Oq uy ma’lumotlariga ko‘ra, yangi chora AQShga aynan farzand tug‘ish va uning orqali fuqarolik olish maqsadida kelish amaliyotiga qarshi qaratilgan.

 

Bundan tashqari, Tramp tug‘ilish orqali fuqarolik masalasiga oid yana bir farmonni imzolagan. Unda ayrim toifadagi shaxslarning farzandlari tug‘ilishning o‘zi bilan avtomatik ravishda AQSh fuqaroligini olmasligi nazarda tutilgan.

 

AQSh Oliy sudi avvalroq Tramp ma’muriyatining tug‘ilish orqali fuqarolikni cheklashga qaratilgan siyosati yuzasidan qarorlar chiqargan. Shu sababli yangi farmonlar ham huquqiy bahslarga sabab bo‘lishi kutilmoqda.

 

AQShda tug‘ilish orqali fuqarolik olish huquqi mamlakat Konstitutsiyasining 14-tuzatmasi bilan bog‘liq bo‘lib, Tramp ma’muriyati mazkur tartibni qayta ko‘rib chiqishni o‘z siyosiy kun tartibining muhim yo‘nalishlaridan biri sifatida ilgari surmoqda.