Turkiyalik olimning O‘zbekiston haqidagi kitobi nashr etildi
Kemal Yavuz Atamanning 1991-yildan buyon O‘zbekistondagi kuzatuvlari va tadqiqotlari jamlangan "Men tanigan O‘zbekiston" asari o‘zbek va turk tillarida taqdim etildi.
O‘zbekiston mustaqilligining 35 yilligi munosabati bilan turkiyalik olim Kemal Yavuz Atamanning “Men tanigan O‘zbekiston” kitobi nashr etildi.
Nashr Respublika Ma’naviyat va ma’rifat markazi, “Ma’rifat” targ‘ibotchilari jamiyati hamda Ijtimoiy-ma’naviy tadqiqotlar instituti hamkorligidagi “Ma’rifat elchilari” loyihasi doirasida o‘zbek va turk tillarida tayyorlangan.
Kitobda muallifning 1991-yildan buyon O‘zbekistonga qilgan safarlari, ilmiy ekspeditsiyalari, arxiv tadqiqotlari va mahalliy aholi bilan muloqotlari asosida shakllangan kuzatuvlari jamlangan.
Asarda Yangi O‘zbekistonda amalga oshirilayotgan islohotlar, mamlakat taraqqiyoti, madaniy meros va milliy qadriyatlar, shuningdek, O‘zbekistonning xalqaro maydondagi o‘rni xorijlik olim nigohi orqali yoritilgan.
Kitob taqdimotida davlat va jamoat tashkilotlari vakillari, olimlar, akademiklar, ziyolilar, yozuvchi va tarjimonlar, diplomatik korpus, OAV vakillari, talabalar hamda jamoatchilik ishtirok etdi.
